Sewe onderskeidings in die sak!
Die lang ure wat Gerdo Breytenbach, ’n boorling van Modimolle wat aan die Afrikaanse Hoër Seunskool gematrikuleer het, agter die boeke deurgebring het, het vrugte afgewerp.
Hy het onderskeidings in Engels, wiskunde, alpha-wiskunde, wetenskap, ingenieursgrafika en ontwerp, lewensoriëntering en inligtingstegnologie behaal.
Hy het ’n B-simbool vir Afrikaans gekry.
Hy studeer vanjaar bedryfsingenieurs-wese aan die Universiteit Stellenbosch. Dié vindingryke jong man het ’n selfoonspeletjie “Odreg” geskryf wat beskikbaar is op Playstore om sy studies te help betaal.
Belangstellendes kan na “Odreg” op die selfoontoepassing soek en daarna “Balls-up” aflaai.
Gerdo en Mart-Marie Kotzee, Hoërskool Nylstroom se toppresteerder met ses onderskeidings, is albei kinders van prokureurs in Modimolle.
Gerdo se ouers is Gerhard en Ria Breytenbach en Mart-Marie is die dogter van Anna-Marie Kotzee.
Dié twee slimkoppe is reeds sedert babadae vriende.
