Die mans het op Saterdag 11 Mei ongeveer 20:00 na hul vryheid gehardloop nadat hulle volgens kol. Moatshe Ngoepe, provinsiale woordvoerder, tydens ’n roetinebesoek van ’n polisiebeampte ontsnap het.
Volgens berigte op plaaslike veiligheidsgroepe het die mans koers gekies na die beboste braksloot wat naby die polisiestasie geleë is. ’n Grootskeepse soektog tot laatnag het gevolg, maar die mans het die polisie ontglip.
Die Pos het verneem dat ’n polisiebeampte medikasie vir die ontsnaptes geneem het toe hy deur hulle oorrompel is.
Die ontsnaptes is Polano Ndebele, Thapelo Mello en Themba Ncube wat in hegtenis geneem is vir die oortreding van die wet op plofstowwe, Sello Rengane wat in hegtenis geneem is op ’n klag van verkragting, Mpho Obvious Lesese en Kenneth Shuma, wat in aanhouding was vir gewapende roof en Kazen Dluwayo wat in hegtenis geneem is vir huisroof. Teen druktyd was niemand nog aangekeer nie.
“Die omstandighede wat daartoe gelei het dat die mans ontsnap het, word deur die polisie ondersoek,” het Ngoepe gesê.
Altesame 13 verhoorafwagtendes het in Maart 2016 ook uit dié aanhoudingselle ontsnap nadat hulle die versterkte maasdraad van die oefenlokaal oopgedwing het. Die mans het ook braksloot toe gehardloop. Van dié ontsnaptes is weer aangekeer.
Enigeen met inligting kan kapt. Richard Boshomane by tel. 079 894 5501 of hul naaste polisiestasie skakel.
