Dié langasems maak gereed vir Comrades
Langasemlede van die Warmbad/Bela-Bela-marathonklub is weer op pad om die wêreldbekende Comrades-marathon op Sondag 9 Junie in KwaZulu-Natal aan te durf.
Vanjaar se Comrades begin by die Durban-stadsaal en eindig by die Scottsville-renbaan in Pietermaritzburg. Dit beteken dat atlete vir sowat 87 km op die pad sal wees.
Atlete van Bela-Bela kom jaarliks kort voor hul vertrek na Durban byeen om te kuier en mekaar moed in te praat.
Klublede wat vanjaar gaan deelneem, is Tjaart (jnr.), Minnie en Tjaart (snr.) Oosthuizen, Alice Coetzer, Jack Manabile en Neels Venter (klubvoorsitter).
Vir Venter is dit ’n besondere jaar, want hy kan vanjaar in die permanente groen nommer deelneem wat aan atlete toegeken word wat reeds 10 Comrades-marathonne voltooi het. Venter tree vanjaar vir sy 11de Comrades aan.
Die Oosthuizen-egpaar, Tjaart en Minnie, neem vanjaar vir die tiende keer deel en sal dus aanstaande jaar in aanmerking kom vir die permanente groen nommer. Hul seun, Tjaart (jnr.), neem vanjaar aan sy sesde Comrades deel en Coetzer en Manabile gaan albei vir die sewende keer aantree.
