Maluleka het op Vrydag 31 Mei in die hof in Modimolle verskyn. Hy is in April by sy huis in Phagameng in hegtenis geneem op 12 klagtes wat verband hou met hondegevegte en wreedheid teenoor diere, asook die onwettige besit van wild.
Die dierebeskermingsvereniging (DBV) het beslag gelê op 22 honde, meestal pitboelterriërs, bulterriërs en boerboele, drie skilpaaie en drie varke op sy eiendom. Die omstandighede waarin die diere gevind is, is as “ongesond” beskryf.
Die DBV het ná die klopjag aan Die Pos beweer die honde het duidelike tekens getoon dat hulle in gevegte gebruik is en dat daar met hulle gejag is.
Tydens Maluleka se eerste verskyning is hy op borgtog van R3 000 vrygelaat, met streng voorwaardes dat hy nie betrokke mag wees by enige spel waarin diere gebruik word nie, spesifiek hondegevegte of jagtogte.
’n Aantal inwoners het die hofsaak bygewoon uit protes teen hondegevegte.
