Die Pos se lesers is beslis lief vir boeke en die verbeeldingswêrelde wat lees ontsluit.
Dít het ons agtergekom toe ons verlede week in ons weeklikse Vraag van die Week op Facebook gevra het watter kinderboeke vir ons lesers mooi herinneringe inhou.
Ons lesers het behoorlik laat waai met die antwoorde. Dié vraag het selfs ons personeellede steeds aan die praat.
My eie twee gunstelingboeke uit my kinderjare was Twee vir ’n Stuiwer en Oupa Landman se viool. Ek en my broer is al dekades lank op soek na dié twee. Ons loop kerkbasare, tweedehandse winkels, stalletjies en allerhande stowwerige boekrakke plat op soek na dié twee boeke. Ek bly glo hulle gaan nog eendag, onverwags, in my hand spring.
Keina Swart, redakteur van Die Pos en skrywer, vertel sy het in gr. 3 (destyds st. 1) die boek Skrik kom Huis Toe van Dolf van Niekerk gewen. “Die boek het my gefassineer en ek wou opsluit ook met duiwe begin boer nadat ek dit gelees het. Ek het my ook verbeel niemand verstaan my nie, nes die hoofkarakter in die boek. Dit was vir my baie spesiaal toe Van Niekerk dekades later hoor hoe sy boek my geïnspireer het, en vir my ’n getekende eksemplaar van Skrik kom Huis Toe met ’n boodskap voorin gestuur het.”
Riekie du Plessis was die wenner van Die Pos se Facebook-uitdaging. Sy het die volgende oor haar gunstelingboek as kind te sê gehad: “Die beste boek wat ek as kind, en ook weer as volwassene gelees het, was Twee vir ’n Stuiwer. Daar is ook nog Brolloks en Bittergal. Ai, ek het nog steeds ’n kopié van dié boek en dit is baie belangrik in my beskeie versameling.”
Denise Edwards het geskryf: “Ek het baie jonk reeds begin lees. Ek dink die boeke wat die grootste indruk op my gemaak het, was die Trompie- en Saartjie-reekse. My eerste grootmensboek was Somer van die Wensfontein van M. Strydom op die ouderdom van omtrent 10 jaar. Ek kan onthou my ma moes nog destyds spesiale toestemming by die biblioteek gee dat ek die boeke mag uitneem! En sedertdien is ek verslaaf aan lees.”
Stephanie Schilbach het geskryf: “In my skooldae het ons nie bloktyd tydens eksamens gekry nie. Ek het gedurende my gr. 7 Junie-eksamen skelm Plekkie in die Son van Ena Murray in die klas gelees. Ek het my hart en siel uitgehuil, tot groot verbasing van my onderwyser.”
Jolene Nel se gunstelingskrywer was Ena Murray. “Ek het skelm onder my kombers gelê en boeklees as ek reeds moes slaap.”
Juanita Buitendag het gebieg: “Ek het my ma se boek gesteel en skelm Dinge van ’n Kind van Marita van der Vyver gelees. Ek was st. 5 (gr. 7) en het my doodgeskrik. Beste tye!”
Ina Hechter skryf: “My gunstelingboeke was die Saartjie-, Bienkie- en Maasdorpreekse, Joof en sy maats, Trompie en die Uile. Ek het baie daarvan oor en oor gelees. My dogter is nou 10 en sy lees nou reekse wat ek as kind gelees het … ek lees dan sommer weer saam.”
Este du Rand deel ’n lekker herinnering: “Die eerste boeke wat ek kan onthou, was Kinders van die wêreld. My oupa het altyd vir my daaruit gelees. Elke land het ’n boek gehad met kinderstories. Soos Suid-Afrika se bekende Racheltjie de Beer. Ons het ure saam gelees. Ek het naderhand die stories uit my kop geken, maar lees moes Oupa lees.”
Lize Schlebusch skryf: “Ek was mal oor die Jasper-reeks, asook Secret 7. Op hoërskool was Kringe in die Bos vir my ongelooflik. Ek het dit drie maal gelees. Tussen Stasies van Irma Joubert is die rede dat ek wiskunde gedruip het.”
Willem van der Westhuizen se gunstelingskrywer was Karel Kielblock. “Nadat ek Die skat van Java, ’n seerowerboek gelees het, wou ek met alle mag ’n seerower word.”
