Borgtog aan Hepburn toegestaan
Stephan Hepburn kon vandeesweek, ná maande agter tralies, weer huis toe gaan nadat borgtog van R15 000 aan hom toegestaan is.
Dié stap volg nadat sy regspan ’n suksesvolle petisie aan die hooggeregshof gerig het om verlof tot appèl nadat dit in Maart deur die Modimolle-streekhof van die hand gewys is.
Die 39-jarige Hepburn is in Januarie vanjaar tronkstraf van ses jaar opgelê nadat hy skuld beken het op ’n klag van strafbare manslag. Dié klag het gevolg op ’n skietongeluk in Februarie 2016 waarin hy tydens ’n bosvarkjag in die Tuinplaas-omgewing ’n man in ’n mielieland doodgeskiet het.
Hepburn het tydens sy verhoor gesê hy het die aand ’n beweging tussen die mielies gesien en geskiet omdat hy gedink het dat dit ’n bosvark is. Hy het op die liggaam van die 23-jarige Jan Railo afgekom en die Tuinplaas-polisie ontbied. Railo was glo ’n werker op ’n naburige plaas. Die hof het gehoor dat Hepburn met die toestemming van die plaaseienaar gejag het en dat werkers op die plaas in kennis gestel is dat daar gejag gaan word.
Tydens Hepburn se eerste verskyning in die hof was dit volgepak met mense in T-hemde van politieke partye wat beledigings uitgeskree het. Die nasionale vervolgingsgesag het die aanvanklike moordklag teen Hepburn in September daardie jaar na ’n klag van strafbare manslag verander. Pogings tot bemiddeling tussen Hepburn en Railo se familie was onsuksesvol.
Die gerekende advokaat, Mike Maritz, het in Maart vanjaar sy gewig by Hepburn se regspan ingegooi en ’n tweeledige aansoek om verdere getuienis ter strafversagting te bring. Hy het ook verlof tot appèl gerig op grond daarvan dat die vonnis onvanpas is. Landdros Pieter Manthata het dié aansoek van die hand gewys.
- Die saak sal in die hoëhof in Polokwane aangehoor word. Teen druktyd was ’n hofdatum nog nie bekend nie.
