Derde verdagte ná aanval in hegtenis
Die Bela-Bela-polisie het op Vrydag 12 Julie ’n derde verdagte, Caswell Masuku (33), in Hammanskraal in hegtenis geneem in verband met die aanval op Hendrik en Linda Prinsloo, asook Seilie van der Linde, Linda se bejaarde ma.
Die gesin is in die vroeë oggendure van Donderdag 20 Junie in hul huis in die McKenzie-omgewing buite Radium oorval.
Die rowers het die gesin in die hoofslaapkamer vasgebind, waarna die booswigte verskeie artikels, wat ’n handwapen insluit, gebuit het.
Volgens die polisie was twee van die vyf met handwapens gewapen. ’n Ander een het die gesin met ’n AK47-aanvalsgeweer aangehou. Een van die verdagtes was ’n vrou.
Lede van die Heritage Protection Group (HPG), die Bela-Bela-, Mokopane- en Mahwelereng-polisie het op Donderdag 4 Julie twee verdagtes, Justice Mudau (34) en William Bapela (69), in Hammanskraal en Mokopane, in hegtenis geneem. Van die gesteelde items wat aan die Prinsloos behoort het, is volgens die polisie in die twee se besit gevind. Mudau is van Zimbabwe.
Masuku is ’n week later deur lede van HPG, in sameweking met die Bela-Bela-polisie se taakspan, in Hammanskraal aangekeer.
Volgens die polisie het hulle leidrade opgevolg, waarna hulle die voertuig wat vermoedelik in die aanval gebruik is, in Soshanguve buite Pretoria opgespoor het. Die polisie het beslag gelê op die voertuig.
Die voertuigeienaar word nie tans met die rooftog verbind nie aangesien daar vermoed word dat hy die voertuig aan die vermeende rowers geleen het.
Die ondersoek het die polisie na Hammanskraal gelei waar hulle Masuka in die vroeë oggendure van Vrydag 12 Julie voorgelê het.
Masuku het op Maandag 15 Julie sy eerste verskyning in die Bela-Bela-landdroshof gemaak.
Hy, Mudau en Bapela moes weer op Woensdag 17 Julie in die hof verskyn op aanklag van roof.
Die ondersoek na die ander verdagtes duur voort.
