Galleries Sports galleries

Oor die wenstreep…

Die Pos se gereelde bydrae tot sport in en om die Waterberg.

August 8, 2019

Die Pos-span / The Post team Less than a minute

Klou om te hou! Die enjins het die afgelope naweek behoorlik gebrul en die ore laat tuit tydens die vierde ronde van die Hankook 4x4 Challenge Series wat by die kykNET Buite Ekspo by die Sondela-natuurreservaat buite Bela-Bela aangebied is. Altesame 28 deelnemers het hul 4x4-voertuie oor dié uitdagende terrein bestuur. Die kampioenskap vind oor agt rondes op verskillende plekke plaas. Die deelnemers se volgende uitdaging vind eersdaags in Rustenburg plaas. Op die foto trotseer van die deelnemers ’n heuwel op Sondela. Foto: Herman Steyn

Ntsako Miyambo (25) van Modimolle het sy vuiste die afgelope naweek in die Benoni-saal die praatwerk laat doen tydens sy geveg teen Chris Gouws. Miyambo het volgens sy afrigter, Peet Oberholzer, die geveg oorheers en elke ronde gewen, hoewel die telling aan die einde gelykop was. Dit was die middelgewigbokser se eerste professionele geveg. “Ons is reeds deur bokspromotors genader vir sy volgende geveg,” het Oberholzer gesê. Die geveg word op Vrydag 9 Augustus op SABC 2 op die program TKO uitgesaai.

Laerskool Warmbad het op Saterdag 27 Julie hul 23ste Tarentaaljagkompetisie aangebied. Altesame 55 jagters en 16 gidse het douvoordag op plase in die omgewing tarentale en fisante gejag. Die prys-
uitdeling is die aand tydens ’n gesellige byeenkoms gehou. In die middel is Antony Pedroncelli (77), die oudste jagter tydens vanjaar se jagtog. Links is Basie Hattingh (borg) en regs Mike Bosch (skutmeester).

Laerskool Vaalwater se krieketseuns het op Donderdag 18 Julie met nuwe krieketdrag gespog in hul wedstryd teen Swartwater. Op die foto wys Glen Dorfling en AJ Oelofse hoe in hul noppies hulle met die nuwe spandrag is.

Hoërskool Warmbad se eerste rugbyspan het die afgelope naweek geskitter in die semifinale ronde van die VersekerBeker-reeks en hul plek in die finaal bespreek. Die Warries het Hoërskool Akasie met 34-5 geklop. Hier laat loop die Warries se voorryman, Willem van Wyk, met die bal. Die span speel op Saterdag 10 Augustus teen Springs Boys High School in die finale wedstryd van die toernooi. Die Warries sal aangemoedig word deur die skool se pom-pom-meisies wat saamreis na Benoni waar die finale wedstryde plaasvind. Foto: Herman Steyn

Hoërskool Warmbad is met reg trots op sy o.14-span se sege die afgelope naweek op hul tuisveld in die VersekerBeker-reeks se semifinale ronde. Die Warries het Hoërskool Uitsig oortuigend met 31-7 geklop. Mohau Maluleke van die Warries het twee keer agter die doellyn gaan kuier. Die span speel op Saterdag 10 Augustus teen Hoërskool Carel de Wet in Benoni in die finaal. Foto: Herman Steyn

Die Bosveld-tjokkerskoor (gr.0-3) van die Waterbergskool vir CVO het op Saterdag 20 Julie tydens die streekkultuurfees, wat deur die Waterbergskool aangebied is, die beoordelaars met hul musiektalent bekoor. Hulle is genooi om op Saterdag 17 Augustus aan die nasionale BCVO-kultuurfees in Mokopane deel te neem.

Kylie de Jager is die Ecarté-gimnastiekklub van Modimolle se enigste klas 1-gimnas. Die klasse-program is vir jong gimnaste wat buitengewone talent toon. Sy het op Saterdag 13 Julie in Kempton Park aan die Gymagic-kompetisie deelgeneem waar sy algeheel tweede geëindig het. Sy het een goud en drie silwer medaljes vir apparaat ingepalm.

Die Ecarté-gimnastiekklub in Modimolle se tuimelaars het op Saterdag 13 Julie aan die Wild Flames-kompetisie in Pretoria deelgeneem. Hulle het puik gevaar en die volgende plekke behaal in hulle onderskeie ouderdomsgroepe. Voor staan Mario Opperman op sy hande. Hy was algeheel eerste in vlak 6 en Stiaan Opperman (sittend) was algeheel tweede in vlak 6. Rialet Potgieter staan agter en was algeheel tweede in vlak 6, Danike Nortman het in vlak 4 algeheel derde geëindig en Bianca Engelbrecht was tweede in vlak 6.

Hierdie leerders van Laerskool Warmbad, wat almal lede van die Warmbad-gimnastiek- en tuimelklub is, het goed presteer tydens die Suid-Afrikaanse Noordsone-gimnastiekkampioenskap in Junie. Voor is Pieter van Emmenis (silwer) en Silara van der Merwe (goud). Agter is Amelia Louw (brons), Danieta Beneke (goud) en Megan Holtzhausen (goud). Mia Strydom (silwer) was afwesig toe die foto geneem is.

Hierdie karatekas van Laerskool Warmbad het tydens die onlangse Suid-Afrikaanse nasionale karatekampioenskap in Pretoria hul Limpopo-kleure verwerf. Op die foto is Janco Basson, Isabel Beneke, Shaun-Rico Farinha, Ethan Gouws en Hernu Nortjé. Keyen Uys en Louran Wienekus was afwesig met die neem van die foto.

August 8, 2019

Die Pos-span / The Post team Less than a minute