’n Redelike sterk wind het die vlamme in die rigting van Jugamaro Predator Park en Thaba Meetse buite Vaalwater aangeblaas.
Justin Fernandez van Jugomaro Predator Park het om 13:41 op die Vaalwater-veiligheidsgroep hulp gevra, waarna Mariëtte Nicholson, basisbestuurder van die Working on Fire (WOF), wat drie werkspanne in die omgewing bestuur, gereël het dat helpers hulle na die toneel haas.
Die WOF-span, asook boere van die omgewing, het die vlamme volgens Fernandez teen ongeveer 15:00 onder beheer gebring. Fernandez het aan Die Pos gesê die brand het vermoedelik ontstaan toe werkers wat met ’n hidroliese laaigraaf besig was, ’n boom omgestoot het wat toe aan Eskom-kragkabels geraak en die vonke die veld aan die brand gesteek het.
