Drie gewapende rowers het op Sondagoggend 25 Augustus hul rieme styfgeloop nadat die polisie hulle vermoedelik op heterdaad betrap het.
Volgens ’n ooggetuie, wat anoniem wil bly, het hy teen ongeveer 12:20 drie mans uit Pep Stores, op die hoek van 5de Laan en Thabo Mbekistraat, gesien hardloop. Hy het dadelik onraad vermoed en daarna het hy drie skote hoor klap. “Ek het dadelik dekking gesoek en toe die polisie se voertuig gesien,” het hy aan Die Pos gesê. Die polisie was in die omgewing en het dadelik gereageer.
Twee van die drie mans het oor ’n hek gespring en op die vlug geslaan. Die derde een is in die been gewond en het op die sypaadjie in 5de Laan neergeval waar die polisie hom geboei het. Een van die ander twee is agter in die erf van ’n nabygeleë karwasonderneming gevind waar hy in ’n gat weggekruip het.
’n Handwapen is later agter ’n ander onderneming gevind waar een van die rowers dit vermoedelik weggegooi het. Die derde persoon is nog op vrye voet.
Volgens dieselfde ooggetuie het lede van die gemeenskap wat op die toneel was, die gewonde rower aangerand en een het selfs geskree dat hy doodgemaak moet word.
Volgens AO George Ledwaba van die polisie in Mookgophong is die mans van Middelburg in Mpumalanga afkomstig. Hulle het glo kontant en selfone gesteel.
Die polisie het op ’n swart Corsa-bakkie, wat vermoedelik in die rooftog gebruik is, beslag gelê.
Die vermeende rowers het glo die personeel en klante wat in die winkel was, beveel om almal na die stoorkamer te gaan en daarna is die winkel beroof van meer as R88 000. Die geld is alles teruggevind.
Die gewonde man is tans in die FH Odendaal-hospitaal in Modimolle en die ander een het reeds vlugtig in die hof verskyn waar sy borgtog geweier is.
Die saak is uitgestel tot Woensdag 2 Oktober.
In ’n bisarre nadraai van die saak is twee polisielede van Mookgophong in hegtenis geneem op aanklag van diefstal.
Volgens ’n betroubare bron was die geld wat by Pep Stores geroof is glo in ’n blou koelhouer verpak en was dit by die gewonde man. Een van die polisiemanne, ’n konstabel wat ook op die toneel was, het glo die koelhouer met die geld in ’n polisievoertuig gelaai om te verhoed dat die geld deur omstanders gesteel word. Dit het later onder die aandag van ’n ander polisielid gekom dat die koelhouer na die polisiestasie geneem is.
Op aandrang van die senior polisiebeampte is die koelhouer teruggeneem na die misdaadtoneel en ander polisielede wat op die toneel was, het onraad vermoed. Die konstabel is toe versoek om die polisievoertuig oop te sluit en ’n groot bedrag geld is glo in die paneelkissie gevind. Hy is vir ’n verduideliking gevra, maar was nie seker hoe die geld daar beland het nie. ’n Vroulike sersant is ook ondervra oor die geld, maar kon ook nie ’n verduideliking bied nie. Sowat R18 000 is glo in die paneelkissie gevind.
Die konstabel (39) en die sersant (41) is in hegtenis geneem en het reeds in die hof verskyn. Albei is op borgtog van R1 000 vrygelaat.
Die saak is tot Vrydag 4 Oktober uitgestel.
