’n Trop beeste wat in die Melkrivierpad naby Vaalwater geloop het, is onlangs deur die dierebeskermingsvereniging (DBV) verwyder nadat inwoners gekla het.
Die beeste het glo sonder drinkwater langs die pad geloop.
Volgens Annalie Smith van die Waterberg Security Initiative (WSI) het hulle op die klagtes gereageer, maar kon hulle selfs met die hulp van die Dorset-polisie nie die diere se eienaar opspoor nie. Die hulp van die DBV is ingeroep en 21 beeste is op Dinsdag 27 Augustus deur die Mokopane DBV geskut. Die eienaar, wat intussen opgespoor is, sal die skutkoste moet dra.
Volgens die WSI is gehoefde diere wat hoog op hul bene staan soos beeste, perde en wildsbokke soos koedoes veral gevaarlik vir motoriste. Wanneer hulle deur ’n motor getref word, kan hulle tot op die enjinkap rol en die windskerm en dak tref wat ernstige beserings kan veroorsaak. Omdat hulle hoog staan, is hul oë bokant motors se hoofligte en is hulle nie so maklik sigbaar nie.
Ronel Kruis, bestuurder van die Mokopane DBV, het bevestig dat hulle die beeste geskut het. Volgens haar is drie van die beeste wat drie maande gelede vermoedelik gesteel is, deur ’n boer as sy eiendom uitgeken. Die veediefstaleenheid ondersoek die saak.
“Rondloperdiere is ’n groot probleem. Ons kry daagliks oproepe om diere te gaan verwyder. Nie net is dit gevaarlik vir voertuie nie, dit maak ook diefstal makliker,” het Kruis gesê.
Volgens haar los veediewe soms die diere langs die pad as hulle bang is dat hulle gevang word.
“Voordat ons beeste skut, skakel ons eers die veediefstaleenheid om toestemming te kry. Die eienaar is verantwoordelik om die vervoerkoste teen R15 per kilometer te dra, asook ’n skutfooi van R90 per kop per dag. Die koste vir skape en bokke is R70 per kop per dag. Die eienaar moet bewys kan lewer dat die diere syne of hare is,” het sy gesê.
“Soms vat mense kanse en beweer die diere is hulle s’n. In ander gevalle is daar boere wat hul gesteelde diere selfs ná so lank as ses maande terugkry.”
