Die Prinsloos en Van der Linde is in die vroeë oggendure van Donderdag 20 Junie in hul plaashuis in die McKenzie-omgewing deur rowers met vuurwapens aangehou en beroof. Die rowers het vermoedelik deur ’n oop venster toegang tot die huis bekom, het die polisie gesê.
Drie verdagtes, Justice Mudau (24), William Bapela (69) en Caswell Masuku (33), is in Julie onderskeidelik in Hammanskraal en Mokopane aangekeer en van die roof aangekla. Mudau, ’n Zimbabwiër, is ook daarvan aangekla dat hy onwettig in die land is.
Die Bela-Bela-landdroshof het op Woensdag 31 Julie borgtog van R2000 aan Masuku toegestaan en hy is vrygelaat.
Mudau en Bapela is steeds in aanhouding, maar nadat nuwe getuienis in die saak na vore gekom het, het die hof bepaal dat dié twee weer om borgtog aansoek kan doen.
Hulle borgtogaansoek sal op Donderdag 26 September in die Bela-Bela-landdroshof aangehoor word.
- Die vier vermeende klerewinkelrowers, Lerato Kgomo (33), Zandile (33) en Sibusiso (31) Hlatswayo, asook Tshepo Mahlangu (33), het ook weer op Maandag 2 September in die hof verskyn.
Die vier word verbind met die voorval op Donderdag 8 Augustus toe die Exact-klerewinkel in Chris Hanistraat in Bela-Bela beroof is.
Die personeel is aangehou en in een van die stoorkamers agter in die winkel vasgemaak. Volgens die polisie het die personeel geen wapens by die rowers gesien nie.
Die verdagtes het in twee voertuie, ’n wit Volkswagen Polo en ’n swart Citi Golf, gevlug. Die gesteelde items het selfone, beursies en klere ingesluit, het die polisie vroeër gesê.
Die swart Golf is skaars twee uur later ná ’n kort jaagtog naby die Maubane-afrit op die N1-snelweg, met die vier verdagtes in voorgekeer, het die polisie gesê. Die wit Volkswagen Polo was nêrens te vinde nie.
Die vier verdagtes is tydens hul laaste verskyning in die landdroshof op Bela-Bela daarvan ingelig dat hul saak na Maandag 30 September uitgestel is vir verdere ondersoek. Daar moet ook bepaal word of hulle om borgtog kan aansoek doen. Hulle is steeds in aanhouding.
Volgens die provinsiale polisie word die vier verdagtes tans met ’n reeks rooftogte, wat sedert Januarie in verskeie provinsies gepleeg is, verbind. Die ondersoek duur voort.
