Basaar vir bejaardes stel nie teleur nie
Die Naboom Tuiste vir Bejaardes se jaarlikse basaar wat deur die kerke en gemeenskap van Mookgophong aangebied word, was weer ’n heerlike opskop.
Die inwoners van Mookgophong het op Saterdag 7 September die koue trotseer en gesorg dat meer as R10 000 ingesamel word ten bate van die inwoners van die Naboom Tuiste vir Bejaardes. Die tuiste is baie afhanklik van die samewerking van die gemeenskap. Hercules Louw, bestuurder van die tuiste, het sy dank uitgespreek teenoor almal wat ’n bydrae gelewer het.
Die plaaslike lyndansers het, soos in die verlede, hul danspassies gewys en die rolstoelwedren, wat deur Paul van der Schyff gereël is, het vir groot vermaak gesorg. Sydney Wells het die voete laat jeuk met sy musiek.
Die voorskootkompetisie was een van die hoogtepunte van vanjaar se fondsinsameling. Die eerste prys het aan Wilma Nel gegaan wat haar prysgeld van R500 dadelik aan die tuiste geskenk het.
Marrané Pieterse met haar oorspronklike Roedtan-voorskoot het die tweede prys van R250 gewen en Nonnie Sauerman het ’n houer gevul met kraakvars groente as derde prys weggedra.
“Ons harte is met dankbaarheid gevul teenoor almal wat hierdie goeie saak ondersteun het,” het Toeks Erasmus, wat die kompetisie gereël het, gesê.
Die deelnemers het van so ver as Mokopane gekom en talle voorskote is aan die tehuis geskenk.
