Verhoor oor erwe begin
Die snelgroeiende Tsakane-nedersetting het ’n reusekopseer vir grondeienaars in die omgewing geraak.
Die verhoor van twee mans wat daarvan aangekla word dat hulle wederregtelik grond aan mense in die Tsakane-nedersetting op die Eersbewoond-pad verkoop het, begin eersdaags in die Bela-Bela-landdroshof.
Andries (42) en Harrison (59) Mojela is in Junie in hegtenis geneem op aanklag van bedrog. Luidens die klagstaat het hulle inwoners van Tsakane bedrieg deur grond aan hulle te verkoop.
Die twee voer glo aan dat hulle onder die indruk was dat hulle toestemming van die Bela-Bela-munisipaliteit gehad het om grond te verkoop, maar luidens die klagstaat het hulle geen magtiging in dié verband gehad nie.
Henriëtta Ledwaba, ANC-hoofsweep van die munisipaliteit, het die klag teen die mans gelê.
Die snelgroeiende Tsakane-nedersetting het ’n reusekopseer vir grondeienaars in die omgewing geraak. Die Pos berig al maande lank oor klagtes van misdaad, onwettige sjebeens en rusverstoring.
Boonop het die eienaarskap van die grond waarop die nedersetting ontstaan het, ook ’n twis veroorsaak. Sover Die Pos kon vasstel behoort die grond aan die Waterberg-distrik- munisipaliteit, maar is daar ’ n proses aan die gang om die grond na die Bela-Bela-munisipaliteit oor te dra.
Kabelo Mosito, munisipale woordvoerder in Bela-Bela, het vroeër gesê die munisipaliteit moet steeds bepaal of hulle die nodige infrastruktuur en geld het om dienste aan dié nedersetting te voorsien.
- Borgtog van R1 000 is aan Andries Mojela toegestaan en R500 aan Harrison.Die mans se verhoor is geskeduleer vir Vrydag 20 September wanneer die hof na verwagting die eerste getuienisse sal aanhoor.
