Twee trokke bots teen stilstaande trok op Eersbewoondpad
Drie trokke was om middernag op Vrydag 4 Oktober in ’n ongeluk op die Eersbewoondpad tussen Modimolle en Bela-Bela betrokke nadat een trok vermoedelik onklaar geraak en op die ryvlak gaan staan het.
Die ander twee trokke het daarna teen die stilstaande een gebots. Twee mense is sover vasgestel kon word, beseer.
Marius Bacon, lid van die gemeenskappolisiëringsforum (GPF), het aan Die Pos gesê die trok wat onklaar geraak het, is teen ongeveer 20:00 reeds in die pad opgemerk. Bacon het gesê daar sal deur ondersoekwerk vasgestel word of die nodige waarskuwingstekens in die pad geplaas is, soos wat die wet vereis.
Volgens Bacon is ’n plaaslike insleepdiens na die toneel ontbied, waarna motorwerktuigkundiges probeer het om die trok te herstel. Twee van dié werktuigkundiges was onder die trok toe die twee ander trokke teen die stilstaande een gebots het, het Bacon gesê.
Die polisie en ambulansdienste is na die toneel ontbied terwyl GPF-lede die verkeer gereguleer het. Die beseerdes is na ’n plaaslike hospitaal geneem, het Bacon gesê.
Die polisie ondersoek die saak verder.
- Mamoketsi Ngobi (30) is op Saterdag 5 Oktober in die vroeë oggendure in die Cyferskuil-omgewing naby Radium dood nadat hy en vier ander mense in ’n voertuigongeluk betrokke was.Die insittendes is glo van Pretoria. Die bestuurder en die ander beseerdes is volgens die Bela-Bela-polisie na die Warmbad-hospitaal vir behandeling geneem.Die polisie ondersoek ’n saak van strafbare manslag.
