Koketso Ngubane en Tshepo Modimbane het op Donderdag 17 Oktober in die landdroshof in Modimolle verskyn nadat ’n bejaarde man se bankkaart glo by die Absa-kitsbank in die ModiMall op ’n slinkse wyse by hom afgevat is, het AO James Findlay, woordvoerder van die Modimolle-polisie, gesê.
Ngubane het skuld beken op die aanklagte teen hom en is tot 12 maande tronkstraf gevonnis, wat vir vier jaar opgeskort is. Die saak teen Modibane is teruggetrek in ’n pleitooreenkoms met die staat.
Sers. Amanda Rossouw, ondersoekbeampte in die saak, het volgens Findlay vasgestel dat die polisie in Midrand op soek is na Modibane in verband met ’n bedrogsaak wat uit 2016 dateer.
Volgens Findlay het die twee mans se gesigte vir Rossouw bekend gelyk en sy het gaan soek na kringtelevisie-opnames van ’n soortgelyke voorval waar ’n vrou op Saterdag 5 Oktober by dieselfde kitsbank ’n slagoffer was.
Die twee mans is in die beskuldigde bank opnuut in hegtenis geneem. Die polisie het vasgestel dat die motor waarmee die twee verdagtes gery het, gehuur was. Die verhuringsmaatskappy het bevestig dat die motor op die betrokke dag in Modimolle was, het Findlay gesê.
Die twee verdagtes is glo van Daveyton in Benoni. Hulle het weer op Vrydag 18 Oktober in die hof verskyn.
