Jurgens Oberholzer (64), ’n pensioentrekker en gewese nutsman wat die afgelope 15 jaar in die dorp gewoon het, se skielike dood word deur die Bela-Bela-polisie as “baie vreemd” beskou. Die voorval het op die hoek van Pretoriaweg en Chris Hanistraat, reg voor die onderneming Scribble & Skryf in die sentrale sakesektor, plaasgevind.
Volgens die polisie beweer ’n ander inwoner, wat aan oorkant van die pad gestaan het, dat hy gesien het hoe iemand vir Oberholzer vasgedruk het terwyl drie ander mans teen die muur van die gebou gestaan en toekyk het. Die inwoner het vermoed dat iets nie pluis is nie en het oor die pad gestap om te kyk wat aangaan.
Die oomblik toe die inwoner nadergekom het, het die groep mans op die vlug geslaan, het dié man aan die polisie gesê. Die inwoner het ’n ambulans ontbied omdat Oberholzer ontsettend geskok was.
Sover die polisie kon vasstel, is niks van Oberholzer gesteel nie. Hy is in die hospitaal in die dorp opgeneem waar hy later die middag oorlede is.
AO André van de Venter, ondersoekbeampte in die saak, het by navraag aan Die Pos gesê Oberholzer het, sover vasgestel kon word, geen fisieke beserings gehad nie. Die polisie wag nou op die uitslag van die nadoodse ondersoek.
Sy begrafnis vind plaas op Saterdag 16 November om 11:00 vanuit die AGS-gemeente in Ludorfstraat, Bela-Bela.
Enigiemand met inligting oor die voorval word gevra om Van de Venter te bel by tel. (014) 736 9713 of tel. 083 604 1673.
