Verskeie honde is die afgelope twee weke in die Bela-Bela- en Settlers-omgewing deur boosdoeners, wat daarna by die persele probeer inbreek het, vergiftig.
Die eerste voorval was laatnag of vroegoggend op Vrydag 8 November op ’n plaas op die Thabazimbi-pad buite Bela-Bela.
Die eienaar, wat om veiligheidsredes anoniem wou bly, het aan Die Pos gesê twee van hul honde is dood nadat hulle gif ingekry het.
“Ons het een van ons honde buite ons erf gesien lê en besef hy is vergiftig, waarna ons onsself dadelik in die huis toegesluit het. Ek kon nie verder slaap nie,” het die slagoffer gesê.
“Teen dagbreek het ek die kleiner hondjie, wat in die huis was, uitgelaat, maar ek het opgemerk dat hy vreemd opgetree het en hy is ook kort daarna dood. Ons het later gif in die huis se badkamer gevind wat die verdagtes vermoedelik deur ’n oop venster gegooi het. Dieselfde oggend het ons besef dat ons Toyota Hilux-dubbelkajuitbakkie gesteel is.”
Die buurtwag en die polisie is uit na die toneel en ’n soektog na die voertuig is begin.
Die slagoffers het intussen verneem dat familielede wat naby hulle woon, se honde ook vergiftig is.
Die gesteelde bakkie is later opgemerk waar dit in die rigting van Mookgophong op pad was, maar die booswigte het die polisie ontglip.
In nog ’n voorval is die Daling-gesin van Settlers op Vrydag 15 November geteiken.
Elmien Daling het by navraag gesê hulle honde het teen 01:30 die oggend aan die blaf geraak, waarna haar man, Gerhard, gaan ondersoek instel het.
Twee van hulle honde is dood gevind en ’n derde sterk tans by die dierekliniek in die dorp aan, het Elmien gesê.
Sover hulle kon vasstel het die verdagtes niks gesteel nie.
“Ons het via ons veiligheidsgroepe verneem die oomblik wanneer honde vergiftig word, word ’n groter misdaad beplan,” het Elmien gesê.
“Ons plaaswag is op hul hoede vir enige verdagte aktiwiteite en ons moet nou net veiliger optree.”
Sy het vertel dat daar vroeër in die week bewerings was dat nóg honde naby ’n plaaslike ingenieursonderneming, asook by die Settlers-rolbalklub, vergiftig is. Die polisie kon dit egter nie bevestig nie.
By al die onlangse gevalle het die verdagtes heiningdrade geknip of deur die drade geklim om toegang tot die eiendomme te kry, het die slagoffers aan Die Pos gesê.
Die gif is volgens die slagoffers op vleisstukke gestrooi en uitgegooi vir die honde.
Die waarskynlikheid dat die gif, wat meestal as plaagdoder gebruik word, by boere gesteel is, is ook ’n groot moontlikheid, het van die slagoffers gesê.
Die betrokke slagoffers bedank hul bure, vriende en die hulp van die buurtwagte wat flink opgetree het. Die polisie ondersoek die sake verder.
