Bek-en-klouseer steeds bron van kommer – man in arres wat vee vervoer
Veeboere se hoop dat die uitbraak van bek-en-klouseer in Limpopo vinnig gestuit gaan word, het vervaag nadat die die departement van landbou, bosbou en visserye nòg besmette eiendomme in die provinsie opgespoor het.
In die nadraai van die ondersoeke is ’n man, wat daarvan beskuldig word dat hy tot die verspreiding van die siekte bygedra het, deur die polisie in hegtenis geneem.
Brig. Motlafela Mojapelo, provinsiale polisiewoordvoerder, het gesê die man, Stephanus Petrus Snyman (ouderdom onbekend) van Polokwane is op Vrydag 24 Januarie in hegtenis geneem en kragtens die wet op dieresiektes aangekla. Mojapelo het gesê die man het glo vee uit ’n gevaargebied na ’n onbesmette gebied, sonder die nodige toestemming en permitte, vervoer.
Snyman het op Maandag 27 Januarie in die Mogwadi-landdroshof op die aanklagte verskyn en is op borgtog van R10 000 vrygelaat. Sy volgende verskyning is op Maandag 23 Maart in dieselfde landdroshof.
Die minister van landbou, Thoko Didiza, het verlede jaar in die staatskoerant aangekondig dat daar ’n landwye verbod op die vervoer van vee ingestel is. Dit het gevolg enkele weke nadat die departement alle veeveilings in Limpopo, Gauteng, Noordwes en Mpumalanga tot ’n halt geroep het.
Die eerste uitbraak is in Januarie 2019 in die Vhembe-distrik aangemeld. Die tweede uitbraak was in die tweede helfte van 2019 in die Molemole-omgewing, noord van Polokwane. Dié uitbraak het onder die owerhede se aandag gekom nadat besmette diere by ’n veeveiling verkoop is. Die departement het bevestig dat die tweede uitbraak dieselfde bek-en-klouseer-serotipes is as wat in Januarie uitgebreek het.
Veeveilings gaan intussen onder streng beheermaatreëls voort, mits ’n vrywaringsertifikaat van ’n veearts die vee vergesel.
Volgens Reggie Ngcobo, woordvoerder van die departement, kan vee binne ’n kwarantyngebied geslag word, mits hulle oor die nodige vrywaringsertifikate beskik en die diere geen teken van die siekte toon nie.
Die nuutste ontdekking bring die totale hoeveelheid eiendomme waar die gevreesde siekte aangemeld is op 16 te staan. Die siekte is sover net in Limpopo aangetref.
Ngcobo beweer dat die nuwe gevalle nie ’n aanduiding is dat die siekte verder versprei het nie, maar dat die departement se volgehoue intensiewe ondersoek daartoe gelei het dat meer besmette vee opgespoor is. Daar is tot dusver 57 persele waarvan die kwarantynverbod reeds gelig en hierdie gebiede siektevry verklaar is.
Streng voorkomingsmaatreëls geld intussen vir boere en veilingskrale.
Volgens inligting van die Bek-en-klouseer-forum (BK Forum) wat in Bela-Bela gestig is, het afslaers, soos Andre Kock en Seun asook Vleissentraal, nuwe bio-veiligheidsmaatreëls in plek gestel. Dié maatreëls geld vir alle veilingshuise.
