Reggie Ngcobo, woordvoerder van die departement van landbou, het in ’n verklaring gesê 16 positiewe gevalle van die siekte is reeds in die provinsie bevestig nadat die siekte in November verlede jaar die veebedryf op sy knieë gedwing het. ’n Nasionale verbod op die vervoer van vee is sedert Desember 2019 van krag. ’n Verbod op veilings is reeds in November 2019 ingestel.
Volgens die Polokwane Review is die verdagte, Sors Snyman, ’n afslaer van die Vleissentraalgroep, twee weke gelede in Polokwane in hegtenis geneem deur lede van die polisie se veediefstaleenheid. Hy word volgens die polisie verbind met aanklagte wat verband hou met die oortreding van maatreëls wat die verspreiding van bek-en-klouseer stuit.
Snyman het na bewering vee uit bek-en-klouseerbesmette gebiede na die siektevrye gebiede Vivo en Dendron (Mogwadi) vervoer en die diere herverkoop, het die Review berig.
Snyman is in hegtenis geneem ingevolge die wet op dieresiektes.
Dié wet bepaal dat geen diere sonder die toestemming van die direkteur van landbou uit besmette gebiede verwyder mag word nie.
Talle boere beweer nou dat dié kalwers verbind kan word met die uitbreking van die gevreesde siekte in November 2019 in dié provinsie.
Snyman het op Maandag 27 Januarie in die Mogwadi-landdroshof verskyn. Borgtog van R10 000 is aan hom toegestaan. Die saak, wat waarskynlik na die streekhof verwys sal word, is tot Maandag 23 Maart uitgestel.
Die besturende direkteur van Vleissentraal se Bosveldstreek, Johann Vosser, het ná Snyman se inhegtenisname by die Polokwane-veilingkrale aan die Review gesê daar is talle bewerings, maar dat hyself wag om die finale klagstaat te sien.
Volgens Vosser moet verkopers diere se oorsprong verklaar — die adres, ID-nommer en brandmerk moet ook op vee verskyn.
Hy het bevestig dat Snyman vir die groep as afslaer werk en vervoerkontrakteurswerk doen.
Die nasionale besturende direkteur van Vleissentraal, Anton Vos, het aan die Review gesê die onderneming het vanaf middel November tot middel Desember 2019, R120 miljoen verloor weens veilings wat gekanselleer moes word.
Die voorsitter van die Bek-en-klouseerforum in die provinsie, Paul van Vuuren, meen dit is te vroeg om ’n uitspraak te maak oor die inhegtenisname, maar het wel genoem dat enige onwettige optrede die bedryf miljarde rande se skade kan berokken en letterlik die “kos uit baie mense se monde kan haal”, het die Review berig.
Verdere inhegtenisnames kan moontlik volg.
Die nasionale verbod op veilings deur die departement van landbou het ná die uitbraak in November die veebedryf groot skade — met finansiële implikasies — berokken. Didiza het dieselfde kommer gedeel.
Sy het in ’n verklaring mense wat die afgelope ruk met Snyman sake gedoen het, of wat bekommerd is oor enige verdagte transaksies, aangeraai om die departement se wetstoepassingseenheid te kontak. Jan Nel van die eenheid kan bereik word by tel. 084 677 3157.
