Hoewel daar reeds ’n nuwe Isuzu-model in die res van die wêreld bekendgestel word, sal Suid-Afrika nog ’n rukkie met die ou model tevrede moet wees. Die lang wag het glo te doen met General Motors se onttrekking uit Suid-Afrika en hoewel Isuzu Suid-Afrika nou aan Isuzu in Japan behoort, kon hulle nie betyds beplan om die nuwe D-Max hier te bemark nie.
Daar is egter nie veel fout met die ou model nie. Hy loop lekker glad en baie kopers hou van die effens kleiner bakwerk wat nie ’n motorhuis so volstaan soos ’n Ranger nie. Die 2.5 liter se relatiewe laekragsyfers word ook grootliks deur die ligter bakwerk tegemoet gekom.
Omdat dubbelkajuitkopers meestal hul bakkies vir ontspanning gebruik, is outomatiese ratkaste meer gewild as ooit. Nou het Isuzu vier nuwe outomatiese modelle bekendgestel wat almal met die 2.5 liter enjin en agterwielaandrywing toegerus is. Daar is drie dubbelkajuite en ’n verlengde kajuit, terwyl daar ook ’n nuwe 3.0 liter outomatiese model bygevoeg is.
Die Isuzu-reeks bied steeds ’n baie aantreklike bakkie teen mededingende pryse aan voornemende kopers. Met die nuwe outomatiese ratkasopsies verdien die Isuzu om op enige kortlys te verskyn.
