Hyundai, wat lank reeds met ’n verskeidenheid nutsvoertuie in sy stal sake doen, het nou ook die intreevlak betree met die kompakte Venue. Die Venue is kleiner as sy twee groter broers, die Creta en Kona, maar terwyl die Creta se stilering redelik standaard is en nie juis aandag trek nie, verseker die Venue se reusesierrooster dat hy nie misgekyk word nie.
Behalwe vir die rooster, wat groter as ’n rugbyklubbraairooster is, lyk die Venue heel skaflik uit die meeste hoeke. Die vooraansig is minstens uniek.
Teen net minder as 4 m is die Venue net so lank soos ’n Ford Ecosport, maar effens breër. Die bagasieruim hou ’n skaflike 350 liter se inkopies en die spasie binne is meer as wat die buiteafmetings beloof. Al die modelle is met ’n driesilinder petrolturbo-enjin toegerus wat ’n bietjie soos ’n motorfiets klink as hy gewillig naby die rooilyn draai. Met ’n kapasiteit van 1 liter sal hy ’n ligte voet beloon met goeie brandstofverbruik. Die twee luukser modelle spog met ’n 20 cm raakskerm wat byna so groot soos my eerste swart-en-wit Telefunken-televisie was.
Hyundai het met sy goeie reputasie en waarde vir geld ’n lojale kliëntebasis gevestig. Hoewel hulle die Venue aanvanklik bemark het as ’n direkte mededinger vir die T-Cross, voel die Volkswagen meer substansieel en beter aanmekaargesit. Hou egter ingedagte dat die T-Cross-reeks op die pryslys begin waar die Venue se luukse voertuig eindig. Die T-Cross is ’n bietjie beter en ’n redelike trappie duurder.
Die Venue vertoon egter baie goed in vergelyking met die Ecosport, wat eintlik sy natuurlike klasmaat is.
