Boere span kragte saam om te help plant

Die boere van die Roedtan-omge­wing het bewys dat hulle nie skroom om hand uit te steek as daar hulp beno­dig word nie.

Toe een van die boere in die omge­wing, Pierre Fourie, ernstig siek geword het, het 14 ander boere en vriende van Fourie besluit om hom by te staan en te help om die koring­saad in die grond te kry.

Fourie het egter ná ’n lang siekbed gesterf, maar daar is besluit om voort te gaan met die planne en die boere het ge­plant.

“Ons groepie het besef dat oom Pierre só ernstig siek is, dat hy nie meer self sy landerye sal kan bewerk nie en daarom het ons besluit om te help,” het een van die boere, wat ano­niem wil bly, aan Die Pos gesê.

Die 300 ha koring is in ’n japtrap ge­plant. Die manne het op Maan­dag 17 Februa­rie vroeg­og­gend begin plant en teen die aand was die saad in die grond. “Daar was nie minder nie as ses trekkers en planters en ook een hoog­loop­spuit in aksie,” het ’n ander boer gesê.

Louw Coetzer en Johan Hart­man het ’n heer­like ontbyt gemaak vir die manne en so ook hul bydrae tot die dag gelewer.

Fourie se skoon­seun, George Barnard, het vleis geskenk sodat daar teen die einde van die dag ’n braai­vleis vir die boere was.

“Hardus de Beer, Hardus de Beer jnr., Louis de Beer, Pieter Niemann jnr. Philippie de Beer, Kobus Smit, Christo Smit, Karel Storm, Pieter Van Heerden, Johan Van Zyl, JP van den Berg, Louw Coetzer, Johan Hartman en Hendrik Swane­poel — julle is ysters en ware staat­makers,” het een van die boere gesê.

“Dit is presies hoe die Vlakte­boere is: altyd daar om te help. Ons is so trots op julle en dankie vir dié wonder­like gebaar,” was een van die inskry­wings wat op sosiale media gemaak is.