Henri Combrink, organiseerder: Goliat van Gat-pampoenfees, skryf:
Die Goliat van Gat-pampoenfees — ’n inisiatief van TLU SA — spog vanjaar met ’n splinternuwe baadjie.
Die fees word op Saterdag 7 Maart vanaf 16:30 by die Pretoria Boeremarkterrein in Morelettastraat, Silverton, Pretoria aangebied en is bekend vir die pampoengroeikompetisie waar deelnemers probeer om mekaar se reusepampoene te oortref.
Die kompetisie het lekker prysgeld op die spel: R12 000 vir die swaarste pampoen, R25 000 vir ’n nuwe Suid-Afrikaanse rekord en R100 000 vir ’n nuwe wêreldrekord. Die bestaande rekord vir ’n reusepampoen in Suid-Afrika word met ’n massa van 613 kg deur Peet Joubert gehou. Die wêreldrekord staan op ’n stewige 1 190 kg.
Die mooiste, lelikste en oorspronklikste pampoene sal ook pryse wen.
’n Nuwe deel van die kompetisie waaroor ons baie opgewonde is, is die ander groot groentegewasse-kompetisie.
“Dit is ’n eerste vir Suid-Afrika en ’n verskeidenheid groente, van beet tot wortels, kan op dié dag deur enigeen ingeskryf word.”
Die VLU se Overvaal-tak bied verder ’n smullekker pampoengeregkompetisie aan waar deelnemers hulle uithalerpampoengeregte kan inskryf.
Afgesien van al die kompetisies, het die fees ook ’n aandmark met ’n wye verskeidenheid stalletjies, biertuin en vermaak deur Thys die Bosveldklong en die VatVas Dansorkes.
Die pampoene wat ingeweeg word, word na afloop van die fees aan verskeie liefdadigheidsorganisasies in en om Pretoria geskenk.
