William van Coller, Modimolle, skryf:
Ek het heelwat op die hart oor die pasafgelope Bosveld Interhoër op Hoërskool Nylstroom se bane.
Hierdie is ’n jaarlikse gebeurtenis wat ’n groot invloed het en vir die gemeenskap wat dit op ’n roterende basis aanbied, is dit ’n groot geleentheid. Die Nylies het hierdie geleentheid aangegryp en in ’n reusesukses omskep. Baie geluk aan al die Nylies: die hoof, personeel, ouers, werkers en borge.
’n Aanhaling uit Waldimar Pelser se boek: “As jy ’n verskil wil maak, doen dit in jou gemeenskap.”
Aan die borge, baie dankie vir julle vertroue in ons skool en dankie dat julle julself op die spel geplaas het in ’n moeiliker ekonomiese tydperk. Aan die skool en sy mense, baie geluk dat julle vir ons borge ekstra myle vir hul beleggingsvertroue gegee het. Saam was julle die wenspan. Inderdaad: saam is ons sterker.
Die klip in my skoen is sakeondernemings (eienaars) wat hul geld uit hierdie gemeenskap wil maak en dan stuur hulle hul kinders na ’n stadskool of sommer net elders. Ek dink dit is verwaand om van jou gemeenskap te verwag om jou onderneming te ondersteun en dan jou winste (die gemeenskap se geld) in die stad te gaan bestee.
Net iets om aan te kou:
- ’n Boom dra sy vrugte waar hy geplant is.
- Jou naaste skool is jou beste skool. En en as jy nie so dink nie, is daar baie werk vir jou.
- Die spreekwoord lui: “Charity begins at home.”
- ’n Ketting is net so sterk as wat sy swakste skakel is.Dankie aan die redaksie van ons puik gemeenskapskoerant, Die Pos, vir julle gemeenskapsdiens. Ek het persoonlik nog net twee keer kleinadvertensies geplaas om sekere items te verkoop en in albei gevalle was die items in ’n japtrap verkoop danksy dié advertensies.
Julle is puik.
