Dr. Pieter Groenewald, Vryheidsfront Plus-leier, skryf:
Die VF Plus verwelkom die maatreëls wat pres. Cyril Ramaphosa aangekondig het om die verspreiding van die Covid 19-virus in Suid-Afrika te beveg en doen ’n beroep op alle Suid-Afrikaners om saam te staan in die aangesig van ’n siekte wat rampspoedige gevolge vir die land en die wêreld kan inhou.
Die verbod op reis na sekere buitelandse bestemmings, die verbod op sekere samekomste, byeenkomste wat gekanselleer is en die sluiting van landsgrense en skole word verwelkom.
Die VF Plus het sedert Januarie 2020 versoek dat daar vroegtydig opgetree moet word en het hierdie versoek en hierdie standpunt in die parlement gehuldig.
Hierdie optrede is proaktief om Suid-Afrikaners teen die virus te beskerm en moet daarom verwelkom word. Die verspreiding van die virus word beperk deur die beweging van mense in te perk en om ’n verbod op groot samekomste of byeenkomste te plaas.
Die publiek moenie nou dink dat hierdie maatreëls Suid-Afrika oornag sal red van die virus, wat dodelike gevolge kan hê nie, maar dit is steeds noodsaaklik dat daar gehoor gegee word en voortgegaan word met persoonlike voorsorgmaatreëls en higiëne.
Gebeure in Amerika het getoon dat die verspreiding van die virus drasties ingeperk is met voorsorgmaatreëls soos die verbod op vlugte na die buiteland, die sluit van grense en die opskorting van byeenkomste.
Die Suid-Afrikaanse regering het geen keuse gehad as om die voorbeeld van ander lande te volg nie.
Indien die kabinet nie hierdie stap geneem het nie, sou die situasie in Suid-Afrika heeltemal handuit kon ruk soos in Europa gebeur het en kon die land met reuselewensverliese en ’n onbeheerbare krisis op hande gesit het.
- Kennisgewing: Koronavirus verslaggewing deur Caxton Local Media poog om fopnuus te kniehalter
Beste leser,
As jou plaaslike nuusverskaffer is dit ons plig om jou ingelig te hou van alle feite rakende COVID-19. Baie fopnuus doen die rondte aanlyn. Caxton Local Media werk gedetermineerd deur massas beskikbare inligting met die doel om waarheid van leuens te onderskei. Sodoende hou ons jou ingelig.
Ons plaaslike nuuskantore volg ‘n streng protokol wanneer dit kom by nuuswerwing en publikasie. ‘n Nasionale taakspan is daargestel om seker te maak dat jy geloofwaardige nuus oor die koronavirus kry.
Lesers met navrae of kommentaar kan ons nasionale groepredakteur, Irma Green (irma@caxton.co.za) of regsadviseur Helene Eloff (helene@caxton.co.za) kontak.
