Die D&D-buurtwag buite Bela-Bela het op Donderdag 1 Novem-ber ’n jaareindgeselligheid vir hul plaaswerkers gehou. Volgens Hannelie Roodt, skakelpersoon, word die werkers betrek by die buurtwag aangesien hulle direk en indirek geraak word deur misdaad. “Plaaswerkers is die oë en ore op die plase en moet deel wees van misdaadvoorkoming,” het sy gesê. Gereelde vergaderings word gehou om probleme te bespreek en nuwe inligting en kontaknommers te verskaf. Op die foto is van die werkers wat deel is van die buurtwag.
’n Bekende inwoner van Bela-Bela, Pieter Cordier (69), is op Sondag 11 November oorlede nadat hy homself vermoedelik geskiet het. Cordier het op ’n kleinhoewe in die Roodepoort-omgewing gewoon. Sy roudiens vind op Vrydag 16 November om 11:00 vanuit die AGS Kerk in Ludorfstraat plaas. Cordier laat sy vrou, Gerda, kinders en kleinkinders agter. Die familie bedank almal vir hul ondersteuning, besoeke en boodskappe in hierdie moeilike tyd.
