Noah Murimo (36), Eunice Chiruvani (40) en Daniel Manyimo (30) is verlede maand deur die polisie en lede van die Heritage Protection Group (HPG) in hegtenis geneem nadat Pretorius by sy woning agter die padstal beroof is.
Pretorius is glo deur een van die verdagtes onkant in die huis betrap, waarna hy en die verdagte oor ’n vuurwapen wat aan Pretorius behoort, begin stoei het.
Die polisie het destyds gesê die verdagte het die wapen by Pretorius afgeneem en ’n skoot afgevuur, maar niemand is getref nie.
Nog ’n vuurwapen is dieselfde dag uit Pretorius se wapenkluis gesteel, maar die polisie en HPG-lede het albei teruggekry.
Murimo was ’n tuinier en Chiruvani ’n huiswerker vir Pretorius en sy vrou, Hettie.
Die verdagtes verskyn in die hof op aanklagte van huisroof en die besit van vermoedelik gesteelde eiendom. Hulle is ook daarvan aangekla dat hulle onwettig in die land is.
Die Pos verneem betroubaar dat die drie se borgtogaansoeke nie tans toegestaan kan word nie omdat hulle tot op hede geen wettige dokumentasie kon indien nie.
Die staat staan borgtog teen.
Die saak is intussen uitgestel na Maandag 18 November, waarna die saak moontlik na die Modimolle-streekhof oorgeplaas sal word.
Murimo, Chiruvani en Manyimo is steeds in aanhouding.
