Die Pos is een van min plaaslike koerante wat nog weekliks met ’n hoofartikelblad spog.
Dit is daardie bladsy in ’n koerant waar lesers én die redakteur, of senior lede van die redaksiespan, hul eie menings kan lug.
Lesers doen dit natuurlik deur briewe aan die redakteur te skryf wat dan in die koerant gepubliseer word en die redakteur of redaksiespan maak gebruik van die hoofartikelkolom (of redakteursbrief) om ’n mening te lug. Dit is die einste kolom wat jy besig is om te lees.
Dit is natuurlik die enigste plek in die koerant waar ’n redaksielid ’n eie mening mág uitspreek. Alle ander nuusberigte moet objektief geskryf word en al die partye waaroor berig word, moet die geleentheid gegun word om hul kant van die saak te stel. Indien daar oor ’n hofsaak berig word, mag daar net geskryf word oor wat tydens die saak gebeur. Daar is geen plek vir die joernalis se mening of persoonlike sentimente nie.
Die doel van ’n hoofartikel is om kommentaar op alledaagse nuusgebeure te lewer. En omdat dié kommentaar die redakteur se eie mening en ervarings weergee , is dit uit die aard van die saak subjektief en met emosie ingekleur. ’n Hoofartikel wat gesonde debat by lesers uitlok, het die toets van ’n goeie hoofartikel geslaag.
Die hoofartikel wat in Die Pos van 24 Januarie 2020 verskyn het onder die opskrif “’n Mooi woord vir ontgroening” het wye reaksie uitgelok en dit is bemoedigend dat lesers die vrymoedigheid het om kommentaar op die koerant se hoofartikel te lewer, en selfs hewig te verskil.
Solank die leserskommentaar deurdag en nie beledigend is nie en in ag geneem word dat die inhoud van die hoofartikelkolom die redakteur se eie mening mág wees, skep dit ’n geleentheid vir goeie, gesonde debatvoering.
Die tradisie van vrye, kritiese debat het ’n geskiedenis wat oor eeue strek en die Griekse filosowe was aan die voorpunt van gesonde debatvoering.
Sokrates se wyse woorde behoort ook in die postmoderne era luid te weerklink:
I know you won’t
believe me, but the
highest form of
human excellence
is to question
oneself and others.
