Luüs is in Oktober 2019 in hegtenis geneem nadat hy daarvan beskuldig is dat hy sy vriendin, Annel Snyman (37) van die Loebies-gasteplaas buite Bela-Bela, vermoor het. Die paartjie was met vakansie by die Cayley Mountain Resort in Winterton, KwaZulu-Natal, toe sy dood is.
Daar is aanvanklik berig dat Snyman haar eie lewe geneem het deur haarself agter die badkamerdeur van die vakansiewooneenheid op te hang. Die polisie het egter kort ná haar dood vir Luüs in hegtenis geneem en beweer hy het haar vermoor. Hy was sedert Oktober verlede jaar in aanhouding in KwaZulu-Natal.
Die hof het verlede week — ná bykans vyf maande in aanhouding — bevind dat hy nie ’n vlugrisiko is nie en wel in aanmerking kan kom vir borgtog.
Luüs, wat in terme van wetgewing nie met die media oor die detail van die saak mag praat nie, het die afgelope week aan Die Pos gesê hy is net bly om weer sy kinders en familie te sien. Sy familie het die afgelope maande onverpoos probeer om hom uit die tronk te kry en bly aandring op ’n regverdige regstelsel waar “borgaansoek” en “verhoor” nie met mekaar verwar moet word nie.
’n Merkbaar maerder Luüs het die afgelope week aan Die Pos gesê hy het reeds weer werksaamhede by sy twee sake-ondernemings, Clear Water Pools en Stone Products, hervat. Hy het gesê kliënte kan op sy kundigheid staatmaak as dit by hul swembaddens kom.
Sy verhoordatum is geskeduleer vir Dinsdag 23 Junie.
