Bejaardes beoog groot opskop
Die Naboom Tuiste vir Bejaardes se jaarlikse basaar, wat deur die kerke en gemeenskap van Mookgophong aangebied word, beloof om vanjaar weer vol pret en plesier te wees.
“Elke jaar sodra die bruidjies van die Bosveld hul eerste spierwit bloeisels vertoon, begin die laaste reëlings vir die groot gemeenskapsbasaar van die Tuiste vir Bejaardes,” het Toeks Erasmus, een van die organiseerders, aan Die Pos gesê.
Inwoners van Mookgophong en omliggende dorpe word genooi na hierdie geleentheid wat op Saterdag 7 September by die tehuis plaasvind. Die tafels sal kreun onder die heerlike kerrie-en-rys, poedings, koeke, kleinkoekies, beskuit, brode, vetkoek met of sonder vleis en worsbroodjies. Daar sal ook ’n wit olifant-stalletjie, pragtige naaldwerk, goedkoop vleis en ander lekkernye te koop wees.
Tussendeur sal daar ’n platejoggie wees met vrolike skoffelmusiek.
Volgens Erasmus sal ’n verskeidenheid groepe optree. Dit sluit die plaaslike lyndansers in en ’n prettige rolstoelresies wat deur Paul van der Schyff gereël word. “Hierdie is ’n komiese geleentheid wat mense nie moet misloop nie,” het sy gesê. Die motorfietsbrigade sal ook hul opwagting maak om hand by te sit en aan die waaghalsige ouer mense die geleentheid bied om weer die wind in hul hare te voel.
Alle organisasies in die dorp word betrek — van die rolbalspelers tot die boereverenigings, kleuterskole, kerke, lyndansers, inwoners en familielede van inwoners.
Die voorskootkompetisie is een van die hoogtepunte van vanjaar se fondsinsameling. Deelnemers kan ’n voorskoot maak teen slegs R20 per inskrywing en die kans staan om R500 te wen. Deelnemers kan besluit of die voorskoot vir die tehuis geskenk word of nie.
Die basaar skop om 08:00 af. Daarna volg die rolstoelwedren om 09:00, die lyndansers om 10:00 en 11:00 en die motorfietsryers om 12:00.
Skakel gerus die Naboom Tuiste vir Bejaardes by tel. (014) 743 0685 vir bydraes, navrae of inskrywingsvorms vir die voorskootkompetisie.
