Pieter Duvenhage, Bela-Bela, skryf:
Geagte meneer die president, ek wil graag my mond behoorlik uitspoel.
Wat is aan die gang in ons land? Ons moet maar net toekyk hoe ons dorpe en stede verwoes word omdat die regering net kop wegdraai en nie wet en orde kan handhaaf nie.
Nou dreig u oor die radio- en televisienuus met swaarder strawwe en geen borgtog of parool vir sekere oortredings soos moord en verkragting. Met reg ja! Maar ander oortredings moet ook vasgevat word.
U dreigemente dra geen water nie, want die mense wat die dade pleeg luister nie radio nie en kyk nie televisienuus nie.
Julle sit in die parlement en howe en kibbel oor ’n landsvlag, haatspraak en grondvat sonder vergoeding, maar steur julle nie aan plaasmoorde, korrupsie en wetteloosheid nie.
’n Burgeroorlog is op hande. Sulke oorloë word dikwels om godsdienstige, etniese of politieke redes gevoer, maar is soms slegs ’n stryd tussen mededingende groepe. Die doel van een kant kan wees om beheer oor die land te neem, onafhanklikheid te bereik en om regeringsbeleid te verander. ’n Sogenaamde “demokratiese” land.
Die stryd kan met ’n bloedbad gepaard gaan. Dit lei dikwels, soos dit nou die geval is, tot ’n lang, voortslepende stryd.
Dit eis menselewens. Ek het bietjie navorsing gedoen omtrent sterftes in burgeroorloë. Sedert 1945 het burgeroorloë tot die dood van meer as 25 miljoen mense, asook die gedwonge verplasing van miljoene meer, gelei. Dit is skokkend.
Burgeroorloë sal en het verder tot die ekonomiese ineenstorting van verskeie lande soos Somalië, Burma, Uganda, Zimbabwe en Angola gelei. Nou volg Suid Afrika op dieselfde pad. Moet ons nie leer uit die foute van ons buurlande in Afrika nie?
Beleggers onttrek hul beleggings, munisipaliteite word ten gronde bestuur, korrupsie is steeds aan die orde van die dag, die lugrederye stort in duie, brandstofpryse skiet die hoogte in en so kan ek talle voorbeelde noem.
Wie ly daaronder? Ons mense wat belasting betaal moet maar opdok sodat die regering van die dag hulself kan verryk. Asseblief meneer, raak ontslae van die leiers op die soustrein, ondersteun die boere sodat wit en swart saam hande kan vat, kos op die tafel kan kry, ons land kan opbou en werk geskep kan word tot almal se voordeel en so die beste land in die wêreld kan word.
